ရှေ့မှတ်တိုင်

ဒီနေ့ဟာ ဒီနေ့မဟုတ်ပဲ
မနေ့ကများလားလို့ ငါစဉ်းစားမိ
ငါကြားဖူးတဲ့ အသံတွေက ကြားနေကျနေရာမှာ
ပေါပေါများများတွေ ငါမထုတ်လုပ်ဖြစ်
တနင်္လာနေ့တိုင်း ဒီအပတ်တော့
ကြောက်/မကြောက်ချင်ယောင်
ဆောင်နေရတဲ့ တစ်ခုခုဖြစ်ဖို့
Band ရဲ့ သီချင်းသစ် တိုင်းကို
အဆိုတော်ဟောင်းအသံနဲ့စိတ်ကူးယဉ်နေသလို
ငါ့ ယားယံမှု့တွေကို တစ်ယောက်ယောက်
ချောင်းကြည့်ဖို့ကြိုးစားနေတော့
တိတ်တိတ်လေးနေလည်း မိမှာပဲမလား
အရာရာဟာ ကောင်းဖို့ဖြစ်လာတယ်လို့
လူတစ်ယောက်ဟာ
ဘယ်ချိန်ထိ တွေးနိုင်မှာလဲပြော
နင်က အရင် ကျူးလွန်ခဲ့သမျှတွေက
ငါအတွက် ဘယ်လိုမျက်ရည် ဖြစ်တာလဲဆိုတာ
တွေးမရတော့ Account log in ဝင်ရင်တောင်
ငါဟာ Remember me ကို ဖြုတ်ရမှ
တိတ်ဆိတ်လွန်းလှတဲ့ မျက်လုံးပုံစံတွေ
အရမ်းဝါဿနာပါရတဲ့
မြင်ကွင်းတွေ စာရွက်တွေထဲ ဝှက်ရင်း
ကောင်းကင်တွေငြိမ်နေသလောက်
လှုပ်ရှားလွန်းနေတဲ့ ညနေက သွေးထဲမှာ
တင်းကျပ်နေတဲ့ကြိုးတွေခံစားသလို
ရှေ့မှတ်တိုင်ဆို တစ်နေရာလောက်တော့
ငါ့အတွက်ချန်ထားကွာ လို့
ငါစိတ်ကူးနေအုံးမလား..။
 
မြေနံ့